15 мамыр күні түркі мемлекеттері басшыларымен бірге Қожа Ахмет Ясауи кесенесіне зиярат еткен Түркия Президенті Режеп Тайип Ердоған кесенеге османдық каллиграф Ахмед Шемседдин Карахисаридің қолынан шыққан Құранды сыйға тартқан болатын.

Осман каллиграфия өнерінің жауһары саналатын Ахмед Шемседдин Қарахисаридің атақты «Қарахисари Құраны» — ислам өркениетінің рухани әрі көркем мұрасының ең құнды үлгілерінің бірі.

Тарихта Әзірет Сұлтан кесенесіне келген хандар, сұлтандар мен зияратшылар қасиетті орынға құрмет ретінде түрлі бағалы сыйлықтар тарту етіп отырған. Бұл – Қожа Ахмет Ясауи руханиятына көрсетілген тағзым мен түркі-мұсылман дүниесіндегі рухани сабақтастықтың айқын көрінісі еді. Сол тарихи дәстүрдің жалғасы ретінде Түркия Президенті Режеп Тайип Ердоған Әзірет Сұлтан кесенесіне «Қарахисари Құранының» бір факсимиле нұсқасын сыйға тартты. Бұл тарту – тек мәдени сыйлық емес, ғасырлар бойы үзілмеген рухани байланыстың, ортақ өркениеттік мұраға деген құрметтің белгісі.

XVI ғасырда жазылған бұл көркем қолжазба бес түрлі классикалық хат үлгісімен көшірілген және алтынмен әшекейленген. Қолжазбаның өлшемі – 44 × 62 × 9 см, салмағы – 16 кг. Бүгінде түпнұсқасы Топқапы сарайы музейінде сақтаулы. Құран каллиграфиясы – тек өнер емес, рухани мәдениеттің айнасы. Осындай мұралар Түркістанның ислам өркениетіндегі тарихи орнын айшықтай түседі.

Сайпулла Моллақанағатұлы,

«Әзірет Сұлтан» Ұлттық тарихи-мәдени музей-қорығы, Ясауитану ғылыми орталығының басшысы.