Бүгін Астанада мәдениет, архив, баспа ісі мәселелері бойынша кеңейтілген алқа отырысы өтті. Іс-шараға премьер-министрдің орынбасары Алтай Көлгінов, министр Асхат Оралов, министрлік қызметкерлері, мәдениет қайраткерлері  және т. б. қатысты.

Бірінші болып сөз сөйлеген мәдениет және спорт министрі Асхат Оралов 2022 жылғы жұмыс қорытындысы туралы айтып, 2023 жылға арналған жоспарларымен бөлісті. Министр биыл мәдениет саласы қызметкерлерінің мәртебесін арттыруға ерекше назар аударылатынын айтты. Бүгінде ұлттық мәртебесі бар мәдениет ұйымдары қызметкерлерінің еңбекақысы 2 есеге жуық өсті. Қазір елімізде осындай 5 ұйым бар, алайда мәдениет және спорт министрлігі осындай нысандардың тізбесін кеңейтуді жоспарлап отыр. Биыл мәдениет саласының тартымдылығын арттыру үшін барлық жерде жұмыс жүргізілетін болады. Нақты айтқанда мәдениет саласы қызметкерлерінің – ЖОО концертмейстерлерінің, үрмелі музыкалық аспаптарда ойнайтын мәдениет ұйымдары қызметкерлерінің, би ансамбльдері артистерінің және т. б. еңбекақысын арттыру туралы болып отыр.

Бұл үшін министрлік заңнамалық өзгерістерді қабылдау бойынша жұмыс жүргізу керек.

Асхат Оралов жас жазушылар мен ақындар үшін де жақсы жаңалықпен бөлісті. Осы жылдан бастап тұңғыш рет Президенттің әдеби сыйлығы табысталатын болады. Әр номинацияның жеңімпазы 4 млн теңге көлемінде ақшалай сыйлықақы алады. Министр мұндай қолдау шарасы талантты жазушылардың жаңа шоғырын қалыптастыруға мүмкіндік беретінін атап өтті.

Сонымен қатар, мәдениет қызметкерлеріне де айрықша көңіл бөлу жоспарланған.

«Мәдениет қызметкерлері шетелдік әріптестерімен танысып, тәжірибе алмасып, жаңа білім алуына арналған халықаралық форум өткізу жоспарланып отыр. Бұл басқосуға аға буын өкілдерінің бас болып атсалысуы өте маңызды. Олардың тәжірибесі мен білімі жастарға үлгі болатыны сөзсіз», — деп атап өтті Асхат Оралов.

Мәдениет және спорт министрлігіне премьер-министрдің орынбасары Алтай Көлгінов бірқатар тапсырма берді. Солардың бірі – монументалды өнер, археология саласындағы мемлекеттік бақылауды күшейту. Алтай Көлгінов бейінді министрлік монументтер жөніндегі комиссияның жұмысын жолға қойып, әкімдіктермен бірлесіп көрнекті тұлғаларға ескерткіштер орнату бойынша бақылауды күшейтуі тиіс екенін атап өтті.

Сондай-ақ тарихи мұраны қорғау жөніндегі өңірлік инспекциялардың қызметін күшейту, өңірлерде мониторингтік тексеруді ұйымдастыру қажет.

Премьер-министрдің орынбасары театр өнерін дамытуға ерекше назар аударды.

«Театр өнері қоғамның мәдени дамуында, адамның рухани баюында ерекше рөл атқарады. Сондықтан министрлік азаматтарымыздың, әсіресе жастардың театрға баруын арттыру үшін барлық жағдай жасау қажет», — деді Алтай Көлгінов.

Мәдениет және спорт министрлігі отандық театрлар мен киностудияларды жаңғырту және қалпына келтіру жоспарларымен бөлісті. Мысалы, шығармашылыққа жаңа жайлы жағдай жасау үшін жөндеу жұмыстары еліміздің ең ірі киностудиясы Ш. Айманова атындағы киностудияда, сондай-ақ, қалпына келтіру жұмыстары — 2026 жылы 100 жылдық мерейтойын атап өтетін Қазақ ұлттық драма театрында да жүргізілетін болады.

Мәдени ағартудан басқа, туризмді дамыту үшін де жағдай жасалады. Мысалы, елімізде азаматтарға жазғы демалыстарын ұйымдастыруға көмектесетін 4 сапар-орталық құрылады. Биылғы жылы «Ордабасы», «Сауран», «Сарайшық» және «Есік» визит-орталықтарының құрылысы аяқталады. Сапар орталықтары заманауи стандарттарға сай, саяхаттардың бастапқы нүктесіне айналып, азаматтардың ұйымдастырылған демалысын қалыптастырады. Сонымен қатар, Астанада «Бозоқ» Ұлттық паркін салу жұмыстары жүргізіліп жатыр.

«Алматыда Орталық мемлекеттік архив жанынан архив қоймасын салу алға қойылған тағы бір маңызды міндет. Орталық мемлекеттік архив қоймасын кеңейту – тарихи-мәдени мұраның бай қабатын сақтау және оған тың құжаттардың қосылуына жағдай жасау», — деді Асхат Оралов.

Сондай-ақ, Мәдениет және спорт министрлігі кітапханаларды тарту орталығына айналдыру үшін оларды дамыту бойынша өршіл міндет қояды. 2022 жылы өңірлерге 506 мың дана кітап таратылды. Биыл бұл бағыттағы жұмыс күшейтіледі. Министрлік оқушылар арасында кітап оқуды насихаттауға ерекше назар аударады.

Сонымен қатар, 2022 жылы Мәдениет және спорт министрлігінің жүйелі жұмысының арқасында 7000 тарихи құжат шетелден елге қайтарылды. Бағалы құжаттарда еліміздің тарихы туралы ақпарат бар, олармен қазір отандық тарихшылар мен ғалымдар жұмыс істейді. Құжаттар Германия және Италия сияқты Еуропалық одақ елдерінен әкелінді.

Сонымен қатар, Асхат Оралов өткен жылы Мәдениет және спорт министрлігінің жұмысының арқасында 18 археологиялық зерттеу жүргізіліп, еліміздің түрлі өңірлерінде 30 ескерткіш қалпына келтірілгенін атап өтті. Олардың ішінде Әзірет Сұлтан музей-қорығы, Отырар қаласы, Жаркент мешіті, Ботай кенті, Бөкей ордасы, Ахмет Байтұрсынұлы музей-үйі, Бекет ата жерасты мешітінің нысандары бар.

«Министрлік шетелден әкелінген тарихи құжаттардағы ақпаратты ғалымдардың зерттеулерінен кейін жариялайды. Бұл оқушылардың  еліміздің тарихы туралы жаңа білім алуына жол ашады. Сонымен қатар, министрлік сапалы кітаптар шығаруға көп көңіл бөледі.  Біз еліміздің кітапханаларына сапалы әдебиеттер жеткізетін боламыз»,- деді министр.

Алқа барысында Министрлік өкілдері еліміздің архив қоймаларының жүктелу мәселесін шешу жолын ұсынды. 500 мың сақтау бірлігіне 20-ға жуық мемлекеттік архив ғимаратын салу ұсынылады.

Жиын соңында мәдениет және спорт министрі Асхат Оралов министрлік Мәдени саясатты дамыту тұжырымдамасын қабылдайтынын атап өтті.

«Мәдени саясатты дамыту тұжырымдамасының жобасында Ұлттық жоба мен Президенттің сайлауалды бағдарламасындағы көрсеткіштер интеграцияланып, халықаралық тәжірибеге шолу жасалды және мәдени саясаттың басым бағыттары қамтылды», — деді министр.

Айта кетейік, жақын арада министрлік спорт пен туризмді дамыту тақырыбында алқа отырысын өткізуді жоспарлап отыр.