Қожа Ахмет Ясауи кесенесінің халықаралық деңгейде мойындалуының басты құжаты Бұл ЮНЕСКО-ның ресми сертификаты — Қожа Ахмет Ясауи кесенесінің заманауи тарихындағы бетбұрысты кезеңнің айғағы. Құжат біздің басты ескерткішіміздің Дүниежүзілік мұралар тізіміне ресми түрде енгізілгенін растайды. Тарихи шешім 2003 жылғы 5 шілдеде ЮНЕСКО-ның Дүниежүзілік мұра комитетінің 27-сессиясында қабылданды. Кесене Қазақстан Республикасынан халықаралық деңгейде осындай жоғары мәртебеге ие болған алғашқы нысан атанды. Бұл құжат нені білдіреді? Дүниежүзілік мұралар тізіміне енгізілу ескерткіштің «айрықша әмбебап құндылыққа» (Exceptional and Universal Value) ие екенін ресми түрде мойындайды. Бұл — ортағасырлық сәулет өнерінің жауһарын бір елдің ғана емес, бүкіл адамзаттың игілігі ретінде танып, оны ерекше қорғауды, тұрақты бақылауды және алдын ала сақтандыру шараларын талап ететін мәртебе. Бүгінде «Әзірет Сұлтан» ұлттық тарихи-мәдени музей-қорығы осы жоғары мәртебе жүктеген міндеттерді бұлжытпай орындауды жалғастыруда. Біз халықаралық ынтымақтастықты белсенді дамытып, озық цифрлық технологияларды енгізіп, тәуекелдерді басқарудың заманауи жоспарларын (Disaster Risk Management) әзірлеу арқылы бұл бірегей ескерткішті келешек ұрпаққа бастапқы қалпында жеткізуді мақсат етеміз. Түркістан қаласының тұрғындары мен қонақтарын музей-қорыққа келіп, бүкіл әлем мойындаған тарихтың ұлылығын өз көздерімен көруге шақырамыз.