Бұдан бұрын хабарлағанымыздай, «Әзірет Сұлтан» Ұлттық тарихи-мәдени музей-қорығы Түркияның Ислам тарихы, өнері мен мәдениетін зерттеу орталығымен (IRCICA) бірлесіп, Американың әлемге әйгілі ғалымы Девин ДиУистің ғылыми зерттеулерінің үлкен бөлігін ағылшын тілінен қазақ тіліне аударып, Стамбул қаласында, IRCICA-ның қаржысымен, жеке жинақ етіп, жарыққа шығарған болатын. Және таяуда ғана Стамбул қаласына барып, жаңа кітабымыздың тұсаукесерін ұйымдастырып, таныстырылымын өткізіп келгенбіз. Бүгін ерекше құнды сол кітапты музей-қорық сайты мен Фейсбук парақшасы арқылы көпшілікке таныстыруды бастап отырмыз.
Америкалық ғалымы Девин ДиУистің 29 ғылыми мақаласы енген, «Қазақстан мен Орталық Азиядағы ислам және Йасауийаның мәдени тарихы» деп аталатын бұл кітап «Әзірет Сұлтан» Ұлттық тарихи-мәдени музей-қорығы директорының міндетін атқарушы Н.Дүкенбаевтың әуелгі сөзімен басталған. Біз де жаңа кітапты таныстыруды әуелі сол әуелгі сөзден бастағанды жөн көрдік.
ӘУЕЛГІ СӨЗ
Дүкенбаев Нұрлан Мұсағалиұлы, «Әзірет Сұлтан» Ұлттық тарихи-мәдени музей-қорығы директорының міндетін атқарушы
Құрметті оқырман!
Қолыңыздағы бұл кітап – Орталық Азияның рухани және мәдени өмірін зерттеуге арналған маңызды ғылыми еңбек. Кітаптың әрбір тарауы, бөлімдері терең зерттеулер мен жаңалықтарға негізделген, өткен дәуірлердегі сопылық дәстүрлер мен мәдениетіміздің дамуына ерекше назар аударады. Мұнда біз Орталық Азиядағы ислам мәдениетінің қалыптасуы мен Ясауия мектебінің ықпалын, сондай-ақ осы аймақтағы Кубравийа тариқаты мен басқа да сопылық ағымдардың ролін қайта қарастырып, олардың тарихи және әлеуметтік маңыздылығын аша аламыз.
Әсіресе Түркістан қаласы аймақтың рухани орталық ретінде осы еңбекте ерекше орын алады. Түркістанда Қожа Ахмет Ясауи кесенесі орналасқан және бұл ескерткіш Орталық Азиядағы сопылық білім мен мәдениеттің символы болып табылады. Ясауи ұстанған жол, оның рухани мұрасы мен насихаты ғасырлар бойы бұл аймақтың рухани дамуына, исламды қабылдаған халықтардың мәдениетіне әсер етіп келеді.
Бұл кітапта Орталық Азияның тарихы мен мәдениетінің түрлі қырлары туралы баяндалады. Жинақталған деректер мен зерттеулер оқырманға жаңа әрі терең түсініктер мен ғылыми тұжырымдар ұсынады. Мұнда тарих пен мәдениеттің әртүрлі аспектілерін біріктіріп, өткені мен бүгінін байланыстыруға, сондай-ақ осы аймақтың ұлы тұлғалары мен олардың ізбасарларының мұраларын бағалауға мүмкіндік бар.
«Әзірет Сұлтан» музей-қорығы, Ясауитану ғылыми орталығы ретінде біз осы еңбек арқылы өзіміздің бай тарихымызды, салт-дәстүрлерімізді және рухани мұрамызды ұрпақтан-ұрпаққа жеткізу міндетін жалғастырамыз. Бұл кітап ғылыми қауым мен барлық оқырмандар үшін баға жетпес құрал болары сөзсіз.
Орталық Азия тарихының терең қабаттарын ашып, рухани мұраны зерттеуге деген қызығушылықтың артуы біз үшін өте маңызды. Осы еңбекті оқи отырып, сіздер жаңа ашылымдармен және тың деректермен танысып, Орталық Азияның тарихи-мәдени мұрасын тереңірек түсінетін боласыздар.
Сіздерге табысты танымдар мен қызықты оқулар тілеймін!
