Түркістан қаласының оңтүстігінде  7 шақырым жерде орналасқан. Координаттары: 43˚14.451΄, 068˚17.622΄. Теңіз деңгейінен биіктігі 220м. Шойтөбе қазіргі ғалымдардың зерттеуінде Шауғар-Шавгар-Шафигар есімді ерте ортағасырлық Шауғар өлкесінің астанасы болған қала орны. Төбе 400х275м көлемінде батыстан шығысқа қарай созылып жатыр. Ең биік жері шығыс жағы, биіктігі 5м. Цитаделі  шахарістанның шығыс бөлігінде  орналасқан  көлемі 170х150м. Шахарістанның солтүстік және солтүстік-шығыс жақтарында құрылыс алаңдары жанасып жатыр. Бұл қаланың рабады. Қалашықтың рабадымен қосқандағы жалпы ауданы 8,1га, цитаделі – 2,7га. 1974 жылы Оңтүстік Қазақстан археологиялық экспедициясы (К.А.Ақышев), 1986ж Қазақ ССР Ғылым академиясының ескерткіштер шежіресінің эскпедициясы (К.М.Байпақов) зерттеулер жүргізген. 1990 жылы цитаделінде (Ерзакович Л.Б.) жетекшілігімен жүргізілген зерттеулер барысында 700м² археологиялық қазба орны ашылды. 1996 жылы ТАЭ (Е.А.Смағұлов, М.Қ.Тұяқбаев) ескерткішті зерттеуді бастады. 1996-1997жж. цитаделі мен шахарістанына стратиграфиялық шурфтар түсірілді. 1994 жылғы «Қазақстанның тарихи-мәдени ескерткіштер шежіресінің» Оңтүстік Қазақстан облысы  бойынша жинағына № 604 санды нөмірімен енгізіліп мемлекет қарауына алынған. Жалпы жер көлемі 15,2 га.